Byggingavaktin, útgáfa nýrrar skýrslu (4.12.09)

Mánudaginn 7. desember kemur út hjá VSÓ Ráðgjöf ný útgáfa Byggingavaktarinnar, skýrslu um framboð íbúðarhúsnæðis í nýbyggingum. Byggingarvaktin kemur nú út í annað sinn en fyrsta útgáfa hennar leit dagsins ljós í júní. Nýrri útgáfu skýrslunnar er ætlað að byggja ofan á fyrri útgáfu með úttekt á stærra svæði og uppfærslu á upplýsingum sem koma fram í fyrri skýrslu m.t.t. þróunar undanfarna mánuði og ábendinga sem fram hafa komið um innihald hennar.

Í nýrri skýrslu verður gerð grein fyrir framboði nýbyggðs íbúðarhúsnæðis í sveitarfélögunum sjö á höfuðborgarsvæðinu og einnig á klukkustundarbeltinu þ.e. þeim þéttbýlisstöðum sem á annatíma eru í um klukkustundar akstursfjarlægð frá miðborg Reykjavíkur en það eru Suðurnes, Akranes, Árborg og Hveragerði. Klukkustundabeltið er ný viðbót við Byggingavaktina en í fyrri skýrslu var ekki farið út fyrir höfuðborgarsvæðið.

Meðal niðurstaða í nýrri skýrslu má nefna að á höfuðborgarsvæðinu eru ríflega þrjúþúsund íbúðir í byggingu en auk þeirra eru ríflega fjögur þúsund lóðir á höfuðborgarsvæðinu tilbúnar til framkvæmda. Gera má ráð fyrir að um 1000-1500 íbúðir seljist á ári hverju og er framboðið því ríflegt af nýbyggingum næstu árin.

Einnig má nefna að flestar þeirra íbúða sem langt eru komnar eru í Reykjavík en þar eru þær 650 talsins. Þá eru 450 langt komnar íbúðir í Hafnarfirði og 400 í Kópavogi. Fæstar eru íbúðir í byggingu hinsvegar á Seltjarnarnesi, alls 30 talsins. Um 80% íbúða í byggingu eru í fjölbýlishúsum.

Byggingavaktin hefur, frá því hún kom fyrst út í júní, vakið talsverða athygli og umræðu um stöðuna á byggingamarkaði en mikill skortur var fram að þeim tíma á allri yfirsýn yfir þennan markað. Nokkrum sinnum hefur verið fjallað um niðurstöður Byggingarvaktarinnar í fréttum, nú síðast í sjónvarpsfréttum RÚV þann 3. des. sl.

Allar nánari upplýsingar um Byggingavaktina veitir Sverrir Bollason skipulagsfræðingur hjá VSÓ Ráðgjof